تیسرے ٹی20 میچ میں نیوزی لینڈ نے پاکستان کو شکست دے کر سیریز میں فیصلہ کن برتری حاصل کرلی۔ ابھی تک کھیلے گئے تینوں میچز میں پاکستان مطلوبہ ہدف حاصل نہ کرسکا۔ پاکستانی بلے باز تیسرے میچ میں بھی ریت کی دیوار ثابت ہوئے اور پلیئنگ الیون میں 3 تبدیلیاں بھی کسی کام نہ آئیں۔
پاکستان نے نیوزی لینڈ میں جاری 5 ٹی20 میچز کی سیریز کے ڈنیڈن میں کھیلے جانے والے تیسرے میچ میں ٹاس جیت کر پہلے نیوزی لینڈ کو بیٹنگ کی دعوت دی، نیوزی لینڈ کی ٹیم نے مقررہ 20 اوورز میں 7 وکٹوں کے نقصان پر 224 رنز اسکور کیے۔
نیوزی لینڈ کے بلے باز فن ایلن نے جارحانہ بلے بازی کا مظاہرہ کرتے ہوئے 62 گیندوں پر 16 چھکوں اور 5 چوکوں کی مدد سے 137 رنز بنائے جب کہ ٹم سیفرٹ 31 اور گلین فلپس 19 رنز کے ساتھ نمایاں رہے۔ کپتان شاہین شاہ آفریدی 16 اور وسیم جونیئر نے ایک رن بنایا۔
پاکستان کی جانب سے حارث رؤف نے اپنے چار اوورز میں 60 رنز دے کر 2 وکٹیں حاصل کیں جب کہ کپتان شاہین آفریدی، زمان خان، محمد نواز اور محمد وسیم نے ایک ایک کھلاڑی کو آؤٹ کیا۔
225 رنز کے ہدف کے تعاقب میں قومی ٹیم 20 اوورز میں 7 وکٹوں کے نقصان پر صرف 179 رنز بناسکی۔
فخر زمان 19، اعظم خان 10، محمد رضوان 24، صائم ایوب 10، افتخار احمد 1 اور محمد نواز 28 رنز بناکر آؤٹ ہوئے۔ بابر اعظم 58 رنز بناکر نمایاں رہے۔ کپتان شاہین شاہ آفریدی 16 اور وسیم جونیئر ایک رن بنا سکے۔
واضح رہے پاکستان کی جانب سے تیسرے ٹی20 کے پلیئنگ الیون میں 3 بڑی تبدیلیاں کی گئی تھیں، اسامہ میر، عامر جمال اور عباس آفریدی ٹیم سے باہر ہوگئے تھے ان کی جگہ محمد نواز، وسیم جونیئر اور زمان خان کو پلیئنگ الیون میں شامل کیا گیا تھا۔
