اسلام آباد : وزیر اعظم شہباز شریف نے کہا ہے کہ 9 مئی کے واقعات ، افواج پاکستان اور سپہ سالار کے خلاف سازش تھے۔
نجی ٹی وی چینل جیو نیوز کے پروگرام میں گفتگو کرتے ہوئے وزیراعظم شہباز شریف نے کہا کہ 9 مئی کی سازش کا سرغنہ چیئرمین پاکستان تحریک انصاف تھے۔
شہباز شریف کا کہنا تھا 9 مئی کی سازش میں خواتین، مرد، سیاسی جتھہ، کچھ فوجی اور ان کے خاندان شامل تھے، 9 مئی کی سازش کرنے والوں کی کوشش تھی کہ فوج کا تختہ الٹ دیں، 9 مئی کی سازش کرنے والے پاکستان میں انارکی اور خانہ جنگی چاہتے تھے۔
وزیراعظم شہباز شریف نے کہا کہ قومی اسمبلی کی مدت 12 اگست کی رات 12 بجے تک ہے، مدت ختم ہونے سے پہلے اسمبلیاں تحلیل کرنے کی سمری صدر کو بھیج دیں گے۔صدر مسلم لیگ ن کا کہنا تھا الیکشن میں پیپلز پارٹی اور جے یو آئی سمیت اتحادی جماعتوں کے ساتھ سیٹ ایڈجسٹمنٹ ہو سکتی ہے، جہاں سیٹ ایڈجسٹمنٹ کی ضرورت نہیں وہاں مسلم لیگ ن اپنا امیدوار کھڑا کرے گے۔
وزیراعظم کا کہنا تھا کہ الیکشن جیتنے کی صورت میں مسلم لیگ ن کے وزارت عظمیٰ کے امیدوار سے متعلق سوال پر شہباز شریف کا کہنا تھا اگر ن لیگ الیکشن جیتی تو وزارت عظمیٰ کے امیدوار نواز شریف ہوں گے۔
